La istoria de Petret e la lupa (u talmén yera Chuan Ralla)

En a bonica parla belsetana biene este contet , en ixe aragonés tan puro, con ixa fonetica tan conserbadera...

Agora tampoco en queda de lupos...

TIEMPOS ABE, asinas el cuentan, un ninno se tresbatió apresiguindo una lupa que per allí dondiaba feba bels diyas, á'l talle, yera criyando e la fambre apretaba.
Petret se deziba iste ninno, á qui la suya mai l'eba deixato á la güembra d'un árbol una tarde de sol d'el mes de chunio, mientres qu'era se frecaba uns caldarez enno río con arena.
Petret no i teneba ni zingo años. Yera enchugardito e fantesioso. Le feban quí sape'l goyo las bestias, sobre tot, es cans.
Béteme que per allí fue á pasar-ie la lupa e á'l biyer-la er dizió:
-¡Osmas! ¡Qué can més bonico! ¡Qué can més bonico! Iste no ye como el nuestro, no ye como el nuestro.
No se sape guaire bien, se ye qu'er la siguió buenamén per aon biyó que se'n iba u que la lupa querió qu'el siguís ta cuan fués pro leixos de lo lucar poder-le chitar el lanze. El caso ye que Petret prenió el camín de la Estiba per aon la lupa se'n yera ita.
Mentrastanto su mai, que yera bien zerqueta d'aon el yera deixato, conna mormor de l'augua no se'n i aperzibió de cosa, ixo que cada inte el yera cosirando, pero en un chirar de güellos el borche s'acazegó.
A'l no biyer-lo empezipeyó á gritar:
-Petret..., Petreeet..., Petreeet...
Abentó el calder que i lebaba n'as mans e tornó á gritar:
-Petreeet..., Petreeet..., Petreeet...
Como no'l i biyeba, buscó y arrebuscó per aquers arrodíos gritando el suyo nombre. Ya cuan no trobó pas cosa, se permenó, contando se fués fotito en augua, alabez corrió á pedir aduya ta lo lucar.
Entre tanto Petret iba fendo camín conna zazoria d'engalzar á ixe «¡qué can més bonico!» qu'er deziba e no i aturaba d'arrepetir per lo camín mientres esnabesaba selbas, leras, barrancos e garroteras dica que arribó ta una penna enna que para el camín per lo mesmo zemal. Allí se i trobó bis á bis conna lupa que l'ensiñó las caixaleras con animo d'atacar-le. Er, alabez, s'anarcó de firme e no sapeba se pretar á fuyir u foter-se de la penna t'abaixo. Tot estando en ixe pensamiento, sintió una boz fuertisma que feba:
-Petret, Petret, no te faya miedo y fote-te t'abaixo, yo te pillaré.Fote-te-ie.
Sin més pensar-lo Petret s'abentó per la penna fendo una boz lastimera de:
-Aiii..., aiii...
Cuan sintió qu'el preneban unas mans grans al tiempo que sentiba:
-Beyes, ya yes salbo.
Petret tremolando per l'espanto en un buen rato no le i saliba garra palabra. Cuan ya podió charrar, encara que tremoloso e mequiando, dizió:
-Tú, ¿quí yes?
-Yo..., yo..., yo soi yo e cosa més. Soco busaltros, busaltros me deziz Chuan, Chuan de la Ralla.
Cuan sintió isto á Petret se le pasoren totas las tremoladeras, fendo uns gollez d'almirazión dezindo con sorpresa:
-¡Tu yes Chuan Ralla, Chuan Ralla! ¡Óoo, Chuan Ralla!
Arrepetindo el nombre de Chuan Ralla, quemesió cuantismas bezes, s'adurmió acarrazato á'l corpaz d'aquer ombre.
N'o lucar, toz ibi yeran mirando á'l ninno per tota man permenatos de tot que no sapeban ta ón pegar.
Á boca de nuet se'l troboren enno branquil de la puerta casa dormindo en un chazillonet feto d'arramas e yerbas.
Cosa més s'ha puesto saper d'ista istoria, només el que el ninno contó.
Se fue un suenio u fue una berdá talmén nunca se saperá.
El que sí fue berdá ye qu'er se tresbatió cuan una lupa fambrosa campaba per lo lucar.

Fuen: http://perso.wanadoo.es/oscar.g/histo/tiemposabe.html
© Ánchel Loís Saludas, «Barré».
Nuei de Tiedas, Xordica Editorial, 1999.