lunes, 18 de febrero de 2008

Las flamas de lo fogaril

Iste ye talmén o poema más conoxito de Veremundo Méndez (Echo, 1897-1968), un d'os millors escritors en aragonés de toz os tiempos. A suya calidá literaria y lingüistica quedan prou bisibles...







¡Qué altas que puyan las flamas
en las nuestras chamineras,
cremando faus y caxicos,
buxacos y ramas secas!
Fan relucir los follíns
de cientos de fumateras,
fendo chuegos, cullebriando
por lo canaril, que a preba
ye metíu en cien añadas
aguantando ixas fogueras
sin quexarse ni tartir
que tanto fuego lo crema.
Lumbre roya y blanquiñosa
toda la cocina emplena,
fendo achiquir lo tedero,
en do se crema la tieda,
u a la luz de la bombilla
que a darla blanca no i-plega.
Relucen los camináls,
los puchés y las cazuelas,
los cercillos de ferradas,
las polidas espederas
y las baldosas, fregadas,
más limpias que la patena.
Las flamas, chisporrotiando,
ven fendo cayer ta tierra
muitas purnas y purnallos
que lo fogaril replega.
Cayen por mils las bolisas
de cenisa y fan por tierra
motiando muitos adornos,como la nieu fa por fuera.
Los güellos te s'encandilan
fito a fito'nta la leña
que, ardiendo, fa mil figuras,
y más de arder te calienta.
Las bolisas que te cayen
las segudes en ta tierra,
pero no apartas los güellos
de la leña que se crema,
ni de las flamas que puyan
altas por la chaminera.
Una nuey, recién cenaus,
mirando las flamas yeran,
prexinando cada cual
u pensando a su manera,
rodiando lo fogaril
toda una familia entera,
en aquella nuey d'ivierno
que l'ausín chiflaba fuera,
chelando a la nieu que empliba
los telláus y las carreras.
Yeran bien aposentáus
en dreita y zurda cadiera,
y, cara a cara lo fuego,
bellos en escamilletas
escuitando, que lo güelo
fablaba d'estas maneras:
- A mí, porque ya só viello,
muita vida no me queda;
pero a estos fogaríls
y polidas chamineras,
que por cientos las añadas
todas, u cuasi, las cuentan,
a morir son condenadas,
como yo, por estar viellas.
De caxicos, de buxacos,
de faus ... ¡qué güenas bagueras
los fogaríls consumiban
en todas las casas chesas!:
en las nueys de Navidá,
en otras que febas veila
u por matar los cochíns
heban que moler especias;
cuando se feba colada,
cuando la casa "creceba",
cuando la casa "menguaba"
y en muitas vispras de fiestas.
Ya no s'aguantan las chens
que por deván se calientan,
lo chelarse por dezaga
que las balda y las amuela.
Ye muito lo que se gasta
si has que carriarte la leña,
y más agún si la compran
los que carriarla no puedan.
Agora no bi-há otra cosa
que esperdicios de la sierra
- pino, abete y fau - mullaus,
que la güena la se levan
por dar algo de triballo
por un zarpau de pecetas.
¡Qué caras que han a costar
si espullaus los mons se dexan!
La vida que ve trayendo
con lo tiempo cosas nuevas,
fa aquí, como en otros puestos,
que muitas cosas se pierdan:
levan calzóns cuatro viellos,
ya se´n fueron las gorgueras,
rondas no'n sientes dinguna,
¡lo tañer ye una fatera!,
¿bailar la jota? ¡soniando!:
ixo, antis más, diz que feban.
Albadas y palotiaus,
romances y sobremesas
iz que cien años ta zaga
aqui'n lo lugar bi-n-heba.
Agora lis ve tocando
la vez a las chamineras,
que no n´ha quedar dinguna
ni p'amostrarla pa muestra.
¡Ah, mal empleau Lugar,
emplíu de cosas tan güenas:
cómo lo tiempo traidor
te ve dexando sin d'ellas!
Ya no tartié más lo güelo;
miré lo fuego que ardeba
y lo altas que puyaban
las flamas la nuey aquella.
Poco a poco se apagueron
como si s'hesen dau cuenta
de lo que d'ellas fablaba
y s'hesen muerto ¡de pena!

No hay comentarios: