martes, 22 de julio de 2008

Reflexions d'Onset: Retolicas: A lei de luengas se ferá


Güe l'Heraldo de Aragón diz que a DGA define a l'aragonés y a o catalán como luengas istoricas y propias d'Aragón pero no las ferá ofizials (ye de dar que se trata de bella filtrazión -estoi que- d'o PSOE).

Cal parar cuenta que encara se parla d'"anteproyecto de ley de lenguas" y que "aún puede sufrir modificaciones". Ye de destacar que, seguntes fuen d'ixe periodico, no se cambeará a denominazión, ye dizir, aragonés y catalán, prou. Iste feito que parix que ye una cosa tan clara, no lo ye tanto ta seguntes quí como o sozio de gubierno d'o PSOE, o PAR quereba que cada conzello dezidise que se parla en o lugar (¿ya no proponen l'orienaragonés (sic) u o chapurriau?). Ya diz o propio Heraldo que o tema d'a denominazión ha prebocato disensions entre as dos formazions. Y ye de dar que pase isto, con qué cara se ban a presentar ixa chentota (bi ha atros nombres pero m'estimo más no dizir-los por aquí) a os que esfienden que aquí no se parla catalán dimpués d'imbentar asoziazions y plataformas.
Iste primer punto ye un d'os fundamentals por os que creigo que no se ba a fer garra lei de luengas porque o PAR no ba a pasar que s'aprebe una lei que diz que en Aragón se parla catalán (y en pagas d'ixo i diz que ye una luenga "histórica"); encara que Biel diga o contrario. Más bien
se mira de sondear a la chen ta, a la fin, no fer cosa.

Tamién se i diz que se creará un "Consejo Superior de las Lenguas de Aragón" que parix que tendrá, entre atras, as siguiens funzions: consultivo, colegiado y asesor, y o que ye más importán: elaborar las reglas de normalización del catalán y del aragonés, ye dizir as propias d'una academia pero ta dos luengas.

O que dixa claro de tot ye qué son "las zonas zonas de utilización histórica". Pero bi ha una cosa preocupán, se parla de definir os territorios seguntes criterios soziolingüisticos (e istoricos). Si se fa por criterios soziolingüisticos (entendito como d'uso sozial d'a luenga) , apaga y vámonos, porque fueras d'a bal d'Echo, a de Chistau, a de Benás y a Baxa Ribagorza Oczidental, en a resta d'o territorio (ni en ixas que he nombrato) a situazión ye cuasi terminal. ¿Alabez que no nos quedaríanos que con cuatre lugars?, que, por zierto, yera a propuesta de belún si nunca se fese a lei de luengas.
Si a lei s'ese feito en os años 1910-1920 (u mesmo en bellas zonas como o Semontano en os años 40-50) alabez sí que se podrían aplicar criterios soziolingüisticos, agora no.

D'o que publica l'Heraldo se pueden fer buena cosa d'interpretazions.

Yo soi prou pesimista u, millor dito, prou realista, y creigo que no se ba a fer garra lei de luengas ni cosa ta protecher l'aragonés. En 2001 sí que me lo creyé pero dimpués de tantas retolicas ya no. Porque antiparte iste asunto, fueras de ziertos zerclos, no interesa, no da botos ni diners. Que bien luego ya emprenzipiarán a meter barraches ta, a la fin, no fer cosa. Tos podría dar buena cosa de razons por as que, creigo, no se ferá a lei pero lo dixamos aquí.

Podez votar en a encuesta d'a dreita. Yo ya lo he feito.

Actualizazión: Güe de nuebas l'Heraldo parla de l'asunto. Ya han emprenzipiato, como yera de dar, as disensions y a oposizión de diferén personas. Leyer as declarazions d'Alcalde (PP) ye penoso. Con o que publica güe l'Heraldo, me reafirmo, encara más, en o que dizié ayer. http://www.heraldo.es/index.php/mod.noticias/mem.detalle/idnoticia.19150/relcategoria.300

6 comentarios:

Salvador dijo...

Aquest Consejo Superior de la Lenguas de Aragón que elaborarà les regles de normalització del català i de l'aragonés, ho farà amb el castellà que és també una llengua d'Aragó?

zel dijo...

Jo ho vaig a fer ara mateix, cap llengua ha de morir, mentre una sola persona la parli, mereix ser cuidada i respectada. Petons!

felquera dijo...

Pufffffffffffffffffffffffffffff
Qué galvana me fa de charrar-ne. El deixo p'altro ratose nunca trobo ganas

Onset dijo...

Salvador, encara no se sabe guaire bien qué ferá. De totas trazas o catalán y o castellano ya son normalizatos (amás los regla a RAE y l'IEC), l'aragonés encara no tenemos un estándar uniboco -y creigo que somos prou luen d'aconseguir-lo-. Amás o catalán que s'amostra -por o que sé- en as escuelas d'a zona catalanofona d'Aragón ye o 'normatiu' (encara que tamién se i trata d'o catalán que se parla aquí).
Se supone que ixe Consello tamién caldría que lo fese con o castellano d'Aragón, pero no s'atribirán.
En caso que se presiente ixa lei será una zaborrería ('chapuza').

Zel, sisquiá toz pensasen como tu. Moltes gràcies.

Felquera, yo tampoco quereba charrar-ne, pero lo he feito ta que a chen d'atros territorios que nos besita conoxca a realidá lingüistica y politico-lingüistica d'o país. (Parlar d'istos temas ya se fa a sobrefaxo).

Anónimo dijo...

Tu, amigo, con iste blog, TREBALLAS por l'aragonés. Creyes en l'aragonés, amas l'aragonés, fas muitas cosas por l'aragonés.

A tu no te calen lais ta fer bibir l'aragonés, tu no asperas una añada, dos, tres, seize añadas, ta dezidir si fas bella cosa ta prebar que a nuestra lengua no s'amorte. A tuya dezisión ye un feito palpiable en o tuyo autuar. Porque tu, como tantos atros, quieres con o corazón ista lengua. Tu fas camín y la emplegas y fas que biba cadaguno d'os días.

Qui no s'estima guaire l'aragonés y o catalán d'Aragón puede asperar una eternidá sin fer cosa dezidindo si fa u no fa, ta a la fin no fer cosa u bien aizions aparens sin conteniu y sin medolla. Y cuan ya s'ha perdiu un tiempo prezioso ta prebar de salbaguardar o patrimonio lingüistico.

Bi ha personas que ya han dezidiu durante muitos años que no s'estiman guaire l'aragonés y o catalán d'Aragón, y prezisamén l'han feito d'a manera más elocuén: no fendo cosa u cuasi cosa.

Si tu t'estimas a bel ser quiesto que ye malenco farás tot o que siga en a tuya man ta dar-li salú y asperanza una atra begada.

Si no bi ha amor por as nuestras parolas, no bi ha ni bi abrá cosa que siga importán y tienga sentiu en a luita por l'aragonés, encara que puedan fer-se lais, u no fe-sen. En tot caso serán lais feitas sin amor, lais bofas, lais con poqueta rasmia que no darán guaire bida a qui menesta toda l'aduya ta continar bibindo.

Perdona porque m'estendillo masiau.


As chenerazions que han de benir bien abrán de saper bel día qui fizo bella cosa y qui no fizo cosa (u cuasi cosa) ta preserbar o infinitamén rico patrimonio lingüistico d'Aragón.


Sí, sin amor por l'aragonés, sin creyer en o suyo esdebenidero, tot ye inútil. Si bi ha encara amor por l'aragonés entre a chen, encara bi ha una finestra enta o futuro, encara bi ha una gran luminaria en a foscor.

Grazias, amigo, por a tuya fe reyal en l'aragonés. Por as tuyas OBRAS.

Chuan Chusé Bielsa

Onset dijo...

Muitas grazias, Chuan Chusé, por tot o que dizes. Aprobeito ta felizitar-te por os tuyos blogs que dan a conoxer a nuestra luenga a chen de bien lexos.
Tiens razón que siempre bi ha una puerta ubierta d'ilusión y d'asperanza.
Con tot y con ixo encara ferá falta que un texto legal reconoxca y protecha l'aragonés d'ista situazión terminal en a que se troba.
Continaremos por iste mundo d'os blogs luitando.