Onsera: Chamineras sin fumo

Chamineras sin fumo ye o títol pero tamién podría aber estato: lugars sin chen, lugars perditos, xeras amortatas... Igual se'n da.
Cualsiquiera bale ta describir una realidá que han sofierto a saber qué lugars d'o nuestro país.

No i hai chen que escatize o fuego ni clabe tizons en a xera ta que as flamas continen puyando y fendo-sen grans; ni ninons que s'encorran por as carreras; ni lolos que, en as nuez d'ibierno, conten contez a os ninons en as beilatas; ni chen que replegue as almendras d'as almendreras; no se sienten parlar as biellas parolas d'o país... No i hai cosa.

Os nuestros lugars, os que encara i hai chen, tienen mal futuro. Gosa aber-ie chen prou endiata, biella, sin garra mena de desarrollo que asegure o futuro d'o lugar. No s'ha feito una politica seriosa que asegurase a la chen en os lugars. En pagas de no fer una politica seriosa, s'ha feito una politica que ha faborexito a emigrazión t'as ziudaz, nomás cal biyer a politica idraulica d'o sieglo pasato (Chanebas y Mediano os suyos maximos exponens pero no pas estión os unicos). Aquí tenez una notizia de fa bien poquet. A clau talmén estió en os primers años 50, dimpués d'a Segunda Guerra Mundial, cuan se desarrolló lo capitalismo salbache franquista, que teneba unas miras prou concretas, que nafró furamén a os lugars fendo como puntos de desarrollo as ziudaz y zonas que interesaban (y prou que no totas). Alabez se podeba aber asentato una linias que esen aturato iste exodo como si de bella guerra se tratase.

A chen como una ringlera de fornigas fuyiban cara ta debán, con a mirada sin tornar enta zaga... como si no sabesen d'an se'n iban, pero sabendo que con els se'n iba un erenzio milenario d'un país que s'esbafaba -y que encara contina esbafando-se-.

Agora, os lugars miran desesperadamén de sobrebibir, se biyen reflexatos en "macroideyas", ya sabrez a cuáls me refiero, pero que no son que "birolla ta güe y fambre ta maitín".

¡Cuánto duelo no fa biyer os lugars sin chen! Lugars que han perdito a suya chen, istoria, cultura, luenga, toponimia, arte, arquitectura... a bida. Ye un tema que a yo me fa muito duelo, fa años que emprenzipié a leyer La lluvia amarilla y me quedé de contino en a segunda pachina.

Biyer carreras amagatas por barzas, xordicas..., ilesias esmicazatas, a escuela án será?, os güertos, as dembas, as zincas malmesos... ye prou triste.

L'Alto Aragón ye o territorio con más lugars desabitatos de tot l'Estato (diz que Asturias talmén tienga más lugars sin chen). Qué dizir de Teruel! Somos en un país an que más d'a metá d'a poblazión bibe en a suya capital. Ixo ye un indicador prou aclaridor. Desmasiato aclaridor.
Bella cosa falla cuan lugars como L'Aínsa que en 1900 teneba más de 3.500 abitadors, en 1981 en teneba 1.200 raditos (ixo que agora ha recuperato chen), Agüero que en teneba 1.000 y agora no arriba a 200... os exemplos serían buen puyal en totas as comarcas. Güe, podríanos parlar que en l'Alto Aragón tendríanos, si a eboluzión s'ese mantenito, una trentena u más de localidaz de más 5.000; y en a resta d'Aragón atro tanto.

Sería prou de mui mal fer una lista de toz ixos lugars. O propio Sercué que parlemos l'atro día, cuasi tota la Bal de Bio, a Sierra de Guara que tamién parlemos fa poquet, tot o Sobrepuerto, os Semontano (agora cuasi denguna arriba a 500 abitadors -ni sisquiera a 200-, cuan en 1900 muitas teneban cuasi 1.000), Monegros... Y Zaragoza? Fueras d'a capital, cuasi totas as comarcas se troban parexitas a las d'o norte.

Talmén a unica asperanza siga ixa chen de difuera que s'establex en os lugars. Un caso ye San Pelegrín, en o Semontano de Balbastro, agora i bibe una muller con -me pa- con dos fillas. Ya lo deziba a tradizión: San Pelegrín, pocos y de mal abenir. Ixe lugarón ya feba muito tiempo que no i bibiba dengún pero, ye de dar, que bibir-ie ha d'estar prou complicato.