lunes, 9 de febrero de 2009

Un añet

Güe chustamén se fa un añet d'Onsera. Ya en ha pasato un.

Si calese fer bel balanze d'iste añet, estoi que sería prou bueno. Soi prou satisfeito. He a confesar que, cuan emprenzipié, m'entrefilaba que sería un fracaso: no tendría guaires besitas, menos interés y encara menos comentarios; y mesmo pensé en dixar-lo en bella ocasión.
Una cosa que me sosprendió, béteme que encara no m'han dito cosa por meter fragmentos de libros, mosica u documentals sin demandar dreitos d'autor.

Dende alabez he publicato 77 dentradas, que han abracato diferens temas, encara que cuasi siempre han chirato arredol d'a luenga, os animals, lugars y paisaches, a toponimia y, más que más, reflexions. Dende que escribié muitas dentradas he aconseguito más datos sobre as cosas que reseñemos -sobre tot de toponimia- encara que no los consigne agora, u ese dito más cosas, como en a zaguera.

Por atra man, l'aragonés ye o beíclo indispensable d'Onsera. Sin l'aragonés no se capiría Onsera, u, a lo menos, sería prou diferén. De seguro, que no sería mica parexito: perdería a suya esenzia. Amás, en bella mida, ha feito onra pa que chen, ya siga d'Aragón -que encara n'i hai- u de difuera, que no conox(eba) l'aragonés, lo conoxese y biyese que no ye una cosa rara (como tampoco no en ye pa -cuasi- tota la romanistica europea, fueras d'o Gubierno d'Aragón que fa o chuego a grupez azientificos, y a ixa Universidad de Zaragoza que no diz ni piu, se ye millor coflato en bel despachet sin fer ni un sacre), que pa fer serbir l'aragonés no cal parlar nomás de dallas, xadas, falzes u zoquetas, u tampoco no, en tiempos más modernos, de politica. Si con Onsera he contribuito a ixo, me'n foi prou contento.
En ixa linia, he considerato que yera fundamental dar a conoxer parte d'a literatura que s'ha escrito, dende tiempo abe, en l'aragonés d'os lugars y bals; y continaré fendo-lo. Quí niega l'aragonés si tenemos chen -dixando fuera os tiempos medievals- que escribiba en ista luenga n'o sieglo XIX -incluindo-ie as pastoradas- u tenemos os testimonios sobrebuens, entre atros, de Saroïhandy.

En ixa linia, tamién, he procurato que o modelo de luenga siga coderén y tienga una unidá lingüistica, y mesmo cheografica (fueras d'o correu, que ye espelunga, no pas espluga/espluca). Ixa, talmén siga, una d'as errors que más a sobén se fan serbir. Ye dezir, meter parolas y estructuras de diferens puntos, ampres d'atras luengas sin garra fundamento, localismos u parolas no propiamén aragonesas a rebullón. Se m'entenderá millor con ista frase: a dalla ye una aina alazetal (sic) que sirbe ta triballar en ro campo. Queda prou claro.

Pero, con tot y con ixo, Onsera existe porque bi ha chen que lo leyez y/u lo comentaz (ixo cal que tos lo agradexca prou). Si querez, continamos.


9 comentarios:

Salvador dijo...

Has fet molt per fer conèixer aquesta llengua aragonesa tan bonica. Ànim i endavant cap al segon any.

Juan Pablo dijo...

Continemos, continemos... Felizidaz y muitos más años...
Bufa, bufa, bufa ixa bela...

felquera dijo...

Mutas felicidatz, tiens un par de semanetas més que yo, con que luego me tocará a yo de celebrar el cabo d'anyo de Felqueral. Pero aora somos con el tuyo, un blog que nos ha sirvierto pa fer relación encara que no nos conoixcamos en persona ni hayamos charrato nunca. Contina entadebant, e felicidatz per fer servir un aragonés estándar que no se fa raro. Salut, e que dure mutos anyos més.

"O zagal de Molinero l'arco" dijo...

¡¡felizitazions montañesas!!.

Alberto dijo...

Felicidades por ista añada.
Contina entabant.

Onset dijo...

Muitas grazias a toz: Salvador, Juan Pablo, Felquera -estoi que emos coinzidito en bella ocasión-, Zagal y Alberto.

Charrabís dijo...

Muitismas felizidaz, onset. Un año ye muito... o blog ya ye mayor de días, asinas que agora a continar como gran. Contina con ista fayena tan buena que yes fendo (y que nos permite a atros de descansar-nos tranquilos una mica, a berdat) y a por muitos años más!

Animo y un abrazo!

Onset dijo...

Muitas grazias, Charrabís. Miraremos de continar, a lo menos emos arribato a lo primer año. Animos pa tu tamién.

Diapllin dijo...

Muitismas felizidaz!! (encara que plego tardi ta Felizitar-te)
Per muitismos mas Post!!
Salut!