miércoles, 4 de marzo de 2009

Por un troz de pan


Fa poquet, a semana pasata, saliba en os meyos -en belún, no guaires-, que un chuez de Barcelona eba condenato a un d'ixos que agora se conoxen como "sin teito" a 18 meses de garchola (en atros puestos diz que ye un año) por furtar meya baguette. Se conox que l'ombre pilló lo pan d'un costato y a dependienta d'o forno d'un atro y se crebó en dos partes. Dimpués o indichén se'n fue con o troz de pan. O chuez considera que ye un delito de "robo con violencia", ya que se barrallón y o 'furtapans' la "intimidó".

Parix tamién que abisón a ixe pobrichón, que furta pans, a declarar debán d'o chuez pero, prou que si no tiene casa no le arribó cosa, no i fue, porque no tiene garra adreza.

Prou que iste siñor no saldrá en garra meyo ni tendrá garra repercusión: simplamén no interesa mica. No ye mica productivo: quí quiere que salga en bel programa un siñor que furta pans?, a quí le interesa?, a quí le interesa a bida d'un siñor que furta pans, que antiparte no tiene casa? Ye más, no tendría garra sentito que i salise.

He pensato que podría fer ixe siñor con un poquet de pan y dimpués de muito pensar-ie, no se m'ocurre que una cosa: minchar-se-la; talmén tenese fambre. Por más que i pienso ye pordemás. Si talmén la bendese en o mercau negro por millons, pero estoi que no, no le darían guaires diners; se podría fer bel entropan, bien se'n bale que no furtó en atra botiga pa aconseguir tomate u quemisió o qué.

Bi ha cosas que nunca no entenderé, ista en ye una. Bien se'n bale que no furtó tamién lamins, sino le cai 20 años. Tampoco nunca no entenderé que fa un año desaparixesen d'una comisaría de Sevilla más de 100 quilos de cocaína (que no ye igual como 100 quilos de pan, encara que tienga farina) y dengún ha dito cosa ni han amanexito (án son as responsabilidaz? y a droga?) y pa qué parlar d'ixos politicos que s'emplenan as pochas a espuertas (parlamos de millons d'euros, no pas de millons de barras de pan) y dimpués ixos meyos de (pseudo)comunicazión, entre que fan fainas por cada mes atras tantas causas, les foten 300.000 euros por fer a charradeta un ratet. Ixos mesmos que parlan de cómo han muerto a una misacha y la miran por toz os cabos, entre que atros se troban perditos tiempo abe sin que dengún aconorte a las suyas familias. A quí quieren engañar? No pas a yo, a yo no.

Compañers que, en bella ocasión, ez creito que yera posible cambiar o mundo, fer-lo millor, pararez cuenta, como ya fa tiempo yo i paré cuenta, que nomás ye que un suenio que como as palomas que, en que beyen un periglo, fuyen a las cuatre suelas, bolan y se'n ban lueñes como qui nunca ha dixato rastro en istas tierras...

Como diría o gran Pepe Rubianes: "el mundo está hecho una mierda".

2 comentarios:

"O zagal de Molinero l'arco" dijo...

En iste pais a chustizia tiene muita miga ... Aspero que iste desproposito cambie belun diya.
"tambien sera posible que esa hermosa mañana, ni tu ni yo ni el otro la lleguemos a ver.Pero habra que empujarla para que pueda ser"

Onset dijo...

A ixe pobrichón talmén le faiga más goyo estar en a garchola que en a carrera. A lo menos minchará toz os días y tendrá un teito, a truca d'a suya libertá.