lunes, 6 de abril de 2009

Crispillos

Güe tornamos a cosas más tribials que no pas charrar de leis que nunca no arribarán, que antiparte cansa prou y no'n saldremos.

Quereba parlar, en istos días que se fan, d'os crispillos (que ye como yo lo he sentito en o Semontano), más conoxitos como crespillos. Ye un postre tipico d'o Semontano de Balbastro -por toz os cabos-, se conox que tamién en fan en L'Aínsa y en bel punto más de Sobrarbe -a biyer si Felquera u O Zagal en saben más u en han feito, u les ne han feito-; y, prou que sí, toz aquels que en sepaz bella cosa.

Refitoliando por Internet he trobato que en a comarca d'o Matarranya tamién en fan, allí les dizen "crespells" pero no son iguals de tot, allí en meten miel.

Pa aquels que los conoxcan cal siñalar que o ingredién clau ye a borraina. U millor dito una fuella de borraina. A borraina tamién ye prou propia d'Aragón, bi ha muita chen que no la conox dellá d'istas buegas.
Tamién se'n fan d'espinais (u espinaques) pero no ye pas o tradicional y parix que no son tan buens.

Os altros ingrediens, antiparte d'as fuellas de borraina, son: farina, zucre, güegos, empreñatuera, anís, lei y una poqueta de sal.

A fin d'o mes marzo se gosa fer en Balbastro una fiesta que chira arredol d'o crispillo, an que en reparten buena ripa pa toz os que i baigan.

5 comentarios:

Chabier Lozano dijo...

N'he comito en La'nfortunada, e creigo recordar que yeran de bleda, pero no me fayas guaire caso perque ya fa una pila d'anyos (casi 10, cómo pasa el tiempo) e no'n he comito ya més nunca. Ixo sí, a yo que soi poco laminer, me ficioren goyo, con que a's que en siatz, de laminers, tos ne fará muto més. Salut, e a pasar buens días se nos deixa l'orache.

"O zagal de Molinero l'arco" dijo...

En casa a mia mai en contina fiendo. Era os fa no mas con masa, o zaguer diya que los fizo ba ser o mes pasau que se chunton os chermans.Ta os mas laminers se fan borrachos d'anis.

Onset dijo...

Muitas grazias a os dos. Nos quedamos con que ye propio d'o Semontano y Sobrarbe.

"O zagal de Molinero l'arco" dijo...

Iste domingo fizon en a Espuña una crespillada ta toz en salir de misa. ye a primera begada que lo fan.Dion crespillos,torta y bin ...y yo me lo perdie,pero m'an mimbiau fotos.

Onset dijo...

Grazias, Zagal, de nuebas por a informazión.