Dos caras

poquet a poquet miraremos de tornar ta la Onsera...

Cara A: En istos zaguers días han amanexito tres u cuatre notizias que no puedo dixar de comentar. Prou que me soi referindo a ixe pobrichón d'ombre, orichinario de Bolivia, d'ixos conoxitos como "sin papeles" (u siga, uno que se muere de fambre), que se talló lo brazo treballando con una maquina, y o chefe lo pilló y le'n tiró t'an que le binió bien y dizió que se continase con o treballo. Estoi que ya conoxerez o que ha pasato. Agora parix que o presidén d'o gubierno español ha dezidito de regularizar-lo (si pierde os dos brazos talmén le dan casa y tot).

O caso ye que isto fa alticamar y encarrañar a la chen (ixo sí, por un u dos días, no más) y os meyos le fan caso, ban ta casa suya, nos amostran qué minchan pa que nos faiga miedo...). Pero lo brazo nunca no tornará.

Cara B: Dimpués d'informar sobre iste pobrichón: un chugador de fútbol (perdón, d'un negozio; u, millor, d'una mafia) tien como pre 94 millons d'euros (bes-te-ne a saber cuánto en ye en pezetas). Miremos d'esmachinar ixos diners en billetes de 500€ chuntez, uno dezaga d'altro, como una ringlera de fornigas... Cuántos metros u quilometros no fería! Bes-te-ne a saber cuánto no cobrará ixe chobenot por año (10 u 15 millons d'euros). Cuántas bidas no abríanos de bibir nusaltros pa cobrar nomás que una chicoteta parte d'ixos diners! Pero imos dellá de tot isto: cuántos espitals no se podrían fer con o que cobrará ixe chobenot en un año!, cuántas escuelas!, cuántas infraestructuras!, cuántos..., cuántos..., cuántos...

Conclusión: en buena ripa d'ocasions he parlato en Onsera d'a chen -con o empentón bien furo d'os meyos- que igual se le'n da tot -prou que no cheneralizo- e iste en ye un nuevo caso (entre altras cosas, cuatre millons de personas sin treballo en tot l'Estato no significa res, siempre nos queda o fútbol, u saber con quí se chita ixe que s'adedica profesionalmén a espiazar animals, eh?).
Como tamién en ye que o presidén d'una republica europea faiga buenas fiestas, siga tot un escandalo, y a l'altro'l día lo tornemos a votar y gane.