Severino Pallaruelo, José, un hombre de los Pirineos, Zaragoza, Prames, 2006, 2ª edizión.Como bibliofilo que soi charraré de libros (por zierto, os gubiernos ya nos podrían dar bella aduya u subenzión pa mercar-ne, que son prou caros). Cuasi yera obligato emprenzipiar por uno que tratase os Perineus. Iste ye o caso.
O libro tenió bel reconoximiento y ya se'n ha feito dos edizions, desgraziadamén -me pa- José morió. Alabez, cuan se fizo o libro, teneba 76 años.
José yera un ombre que bibiba en A Mula (sé an ye, pero no lo he trobato en dengún mapa) solo con a suya chirmana. Ya abe años que se i quedón solez os dos. Bibiban entre selbas, arnals y güellas mirando de sobrebir.
José charra en a suya luenga -l'aragonés- y conta muitas cosas d'a suya bida sobre buena cosa de temas. Como lo leyé fa años no me'n alcuerdo de totas, pero sí de dos: la uno ye cuan José se pensaba que por toz os lentes se i beyeba igual y l'atro que cuan fizo a mili ya emprenzipió a charrar 'fino', pero malas que tornó t'o lugar ya se l'olbidó y tornó a charrar 'mal'.
Pa yo ista chen como José represienta muito más y he aprendito más que no de doctors, catedraticos u o que siga.
Desgraziadamén en os zaguers años y decadas emos perdito muitos Josés (chen como el caldría calificar-la como ombres-mullers alfaya/tresoro) que se'n fuen y se lebón con els a suya luenga, costumbres, tradizions, cosmobisions, gastronomía, chuegos, una forma de bida...
En bels años nomás tendremos chen que sabrá o que ye una playstation u un burguer y no tendrá garra ideya d'o que ye, por exemplo, una zoqueta.
No cal dezir que tos lo recomiendo.
2 comentarios:
A yo este libro m'ha feto mui buena onra, encara que l'aragonés que i sale no sía literal, que el albierte Pallaruelo, que no prenió garra nota perque s'acordaba ya que ye la misma luenga que la suya (no sé qué en dirá aora).
Pa la cultura d'estas montañas tamién ye mui buen de pallaruelo "Viaje por los Pirineos misteriosos de Aragón" u es libros de Enrique Satué. Ye una pena, pero me pienso que la cultura montañesa tien poco futur, menos encara que la luenga.
Yo he conoixito a chen tresoro d'íxes que dizes tú, e ye una pena cuan se'n ban, pero ye lei de bida. Un d'es més importans pa yo que nos deixó abe uns años yera el zaguer abitador de Rebiella, que yera monolingüe aragonés. Cuan charraba con yo miraba de charrar menos "basto", pero cua charraba con altros de la suya balle feba goyo de sentir-lo charrar.
Salut.
Felquera
Yera una miqueta relazionato con o cuadro de Goya que mercó a DGA. O cuadro ixe siempre i abrá tiempo de mercar-lo, manimenos recuperar a luenga y estudiar-la e imbestigar-la será practicamén imposible si a chen que la charra se'n ba. Amás ixa chen siempre son reconoxitos por ixo en os lugars.
Publicar un comentario