miércoles, 5 de noviembre de 2008

O maltrato a os animals: un crimen legal




"Nos vuelve enfermos invocar cada día las bendiciones de Dios, el Compasivo, si no practicamos la compasión elemental hacia nuestras criaturas amigas"

"La grandeza de una nación y su progreso moral pueden ser juzgados por la forma en que son tratados sus animales"

Mahatma Gandhi


Siempre he creito que as soziedaz abanzan si se dan dreitos a las minorías, s'ha feito con os omosexuals, con as personas dependiens..., pero y os animals? Os animals han feito onra a os umanos dende tiempos inmemorials como fuerza de treballo, se les ha espellato ta fer bestuaches, nos los emos minchato, se les fan experimentos que acaban en a muerte, se los ha muerto por esporte (sic), por "espectaclo" (sic)... y tot ixo a truca de qué? Ya lo digo yo: de cosa.

Cal siñalar que o maltrato a os animals no ye restrinchito a un país. En países, que se les denomina "desarrollatos" (será economicamén, no pas moralmén), como Canadá, an que fan barbaridaz con as focas, u Dinamarca, an que fan atro tanto con delfins.
I hai, por desgrazia, muitas formas de maltrato a os animals. Beluna, como ye de dar, ye refusata por cuasi toz, manimenos n'i hai d'atras que no, que en cuenta d'estar una bergüeña son emponderatas. Soi parlando d'as autodenominatas "corridas de toros" u o que ye o mesmo: torturas a os toros dica que mueren. Tot un insulto a la intelichenzia umana.

Y digo que ye un insulto a la intelichenzia umana porque os pseudo-"argumentos" que sueltan no son que un conchunto de fatezas y mentiras sin garra fundamento. Nomás en comentaré belún:


- A mafia que embolica ista mena de tortura diz que o toro de lidia ye una raza unica y que grazias a la lidia sobrebibe, sino ya s'ese extinguito (???). Por ixe regle de tres a toz os animals en periglo d'extinzión (onsos panda, lupos, ballenas, lupos zerbal, etz.) caldrá torturar-los dica morir ta que no desaparixcan. Pero ye más, no existe garra raza que se denomine "toro de lidia" nomás son que os toros que trigan ta torturar-los.

- Diz que os catalans quieren eliminar d'o suyo territorio as torturas a os toros porque "quieren romper España". Por qué no se diz que en Canarias as "corridas de toros" son betatas abe años y dengún ha dito que Canarias quiera "romper España". ¿Por qué s'amaga ixe dato?
Cal emponderar y reconoxer a faina feita por os catalans, pioners en ixe sentito.

- Diz que o toro no sofre. Pero si cuan una mosca se mete denzima d'o toro, íste con a coda la esfuria, prexinaz-tos cuan le claban ixos punchos.


Baxo garra costumbre, tradizión u custión istorica se puede chustificar a tortura a os animals. En bel país mulsumán ye común matar a peñazos a las mullers por delitos d'alduterio. Estoi que encara que siga un costumbre ye una barbaridá y caldría acabar con ixo de camín. Manimenos me s'entrefá que belún d'os que afirman que torturar y asesinar toros ye un arte (sic) biyerían que ixo ye chustizia u, mesmo, arte y cultura. No m'extraniaría mica.




A tauromaquia (u millor dito, tauromafia) no ye que una mafia que, a pur de torturar y asasinar mils de toros, fa negozio ganando millons d'euros a l'año. Toz nusatros, por o feito d'estar ziudadanos españols, pagamos 40 € a l'año en subenzions a ista tortura. ¡A l'año son 564 MILLONS D'EUROS! Miraz-tos aquí.

Quiero remerar que, entre nusatros, teniemos a un gran animalista, Pedro Arnal Cavero -miembro d'a Sociedad aragonesa protectora de animales y plantas- que ya en os años duros d'o franquismo escribiba articlos prou duros cuentra as torturas a os toros y zitando-ie buena cosa d'intelectuals contrarios. Atros animalistas y antitaurinos conoxitos son: Pío Baroja, Albert Einstein, Edison, Kant, Gandhi, Tolstoi, Gandhi u Darwin.

Afortunadamén parix que por cada begata menos se fan torturas por a tv. A tv aragonesa (?), en a suya linia, en fa. De cabo cuan cuan gosaba biyer a tv, fendo zapping biyeba a tv andaluza y ye norma cheneral fer torturas a os toros u programas monotematicos. O pior, y que ye más perigloso, ye fer programas de ninos an que sale ninons, de tasamén tres u cuatre añez, bestitos con o trache d'os torturadors dezindo que malas que sigan grans querrán torturar y asesinar toros como treballo. Bella cosa muito grau falla. Bien se'n bale que a lechislazión no permite tener armas a os ninos sino belún d'istos bel día se cargaría a buena cosa de chen -como en EE.UU. u atros países- en bel instituto u quemisió. Si tan poca considerazión tienen por a bida d'un animal, que amás lo quieren torturar y asesinar, que les costaría de fer-lo con atros sers. Ye o mesmo.

Belún de busatros, dimpués de leyer tot isto, talmén se piense que Onset ye prou radical u extremo en iste tema. En ixe caso, animo a qui creiga ixo que se documente, leiga u nomás se mire diferens imáchens sobre ixa tortura, y alabez parará cuenta que no he dito garra farinazo, y que, más bien, m'he quedato prou curto. Ya podez contar que m'he callato muitas cosas.
Tos consello que tos mirez o blog d'a Colla Antitaurina Oszense. Más que más iste articlo "Cuestiones sobre la tortura" u tamién os Dreitos d'os Animals.

Una cosa cal dixar clara. En iste tema, no se puede estar ambiguo: u a fabor u en cuentra.

Dende aquí, tot o mío odio, disprezio, repugnanzia y atros setimientos y deseyos parexitos a tota ixa chen que partizipa d'a tortura (torturadors, asesinos, espectadors, meyos, taquillers, etz).

Cuan pase o tiempo y arribe una chenerazión de chen que elimine definitibamén d'a Tierra as torturas a os animals, porque as chenerazions de güe no son prestas ta abanzar en ixe sentito, fez-tos memoria que i abió chen que nunca estiemos a fabor y que luitemos en cuentra.


¡Qué de buen fer ye tortura a animals drogatos, dimpués de buena cosa d'oras de transporte, enluzernatos!

Me fa duelo de meter istas imáchens en o blog pero estoi que he de fer-lo. ¡Qué millor argumento! Más bale una imachen que mil parolas.

¿Isto lo consideraz arte, cultura, fiesta? ¿Quí tiene razón, nusatros u els?

Ista elementa, en cuenta d'estar engarcholata, gana millons por torturar animals y bien que se'n fa contenta que o toro aiga bulcato dimpués d'aber-lo torturato.

Arte 100%. Ni Leonardo da Vinci lo fería.







Aquí i podez biyer cómo l'animal en garra momento sofre. Ixo royo no ye pas sangre, ye ketchup que se chita denzima o toro. Malpensatos!

Aquí lo gran artista (sic) con dos trozos de carnuz, esmelicando-se firme



MUITA BERGÜEÑA FA CONSIDERAR-SE SER UMANO CON TOTA IXA CHENTOTA D'ASASINOS Y TORTURADORS


En remeranza de toz os toros torturatos y asasinatos
(bel día pagarán o que son fendo)

8 comentarios:

Chabier Lozano dijo...

Ye que, pa yo, no fa falta argumentos contra esta chentota, no cal razonar-les, perque la razón no ye con ers.

Chuan Chusé Bielsa Alquézar. dijo...

Te felizito, Onsera, por iste articlo, tan balién y que diz as cosas por o suyo nombre.

Senzillamén, un país an se fan istas barbaridaz legalmén no ye zien por zien zibilizato. Y como tu muito bien dizes, en atros países que critican a España por permitir istas crueldaz, se'n fan d'atras que son igualmén un escarnio ta os animals y ta la conzienzia umana.

Me cuacarba que a presencia de tantas mullers en o Gubierno estatal y en os Parlamentos serbise ta cualcosa, me refiero a que la sensibilidà femenina se fese notar tamién en iste ambito.

Sisquiera, poquet a poquet, a chen baiga conzienziando-se y a "fiesta" d'os toros siga beyita en o esdebenidero como lo que ye: un "espectaclo" sanguinario, an no ne b'ha de piedà y que desonra a tot o chenero umano.

Chuan Chusé Bielsa

Joan de Peiroton dijo...

El problema lo conocemos en el sur de Francia también. Cuanta gente estan en favor de las corridas? No me puedo creer que sean mayoritarias. Basta ya.

Anónimo dijo...

Trobada de Fabloggers te combida a participar n'o suyo concurso de microfalordias. Anemate a nimbiar-nos a tuya falordieta, o ganador puedes estar tu.

http://trobada.blogdns.net

trobadafabloggers@gmail.com

Unknown dijo...

PRESENTACIÓN UNIBERSITAIRES POR L´ARAGONÉS

DIA 12 DE NOVIEMBRE DE 2008

AULA 501 EDIFICIO INTERFACULTADES 16.55 HORAS

"O zagal de Molinero l'arco" dijo...

No fa falta fer comentarios, tu l'as dexau bien claro

Culibilla dijo...

Ola!me feria goyo de fer bel comentario sobre isto, que no se si ye o tuyo caso, pero cuento que siempre que se charra d´istas cosas caldría adedicar-le bellas linias a las "atras torturas". Iste tema me mete muit nierbuda, porque tot lo mundo ye antitaurino y qui no´n ye, ye un fachuzo (que tamien ye zierto,jaja). Manimenos, a chen cuan ba t´o mercau merca uegos de pirinas ponedoras que biben en unas garcholas de güeña, sin garra espazio y padezendo lo mayor estrés d´o mundo, en cuentas de pillar os uegos de pirinas criadas en libertat que, sí, son mas caros, pero te garantizan qu´as pirinas han bibiau libres d´estres y sufrimien, y que antimás gosan estar ecolochicos, con o que te garantizan que han minchau productos libres d´inchenieria chenetica. Con os broilers pasa o mesmo. D´atra man, de normal a chen no para cuenta de cómo ha bibiu la baca que les da la carne, ye mas, muitas bezes a chen no se planteya d´an biene la carne y os pais no les ne dizen a os suyos fillez "por no ferir os suyos sentimientos"¿?¿?¿?, y de normal a carne que la chen merca en o "sabeco" u puestos d´ixa mena bienen d´una ganadería intensiba y a ganadería intensiba...tela!!! (iste tema ya lo dixo t´atro diya, que sino, menuda chapa!!) y por no charrar d´as bacas de lei, an m´incluyo, porque asinas como de l´atro no consumo, lei de bacas explotadas si, encara que me miro de beber lei ecolochica u de solla.
Y asinas asinas...

Un atro comentario chicot: o toro de lidia sí que ye una raza. Antismás sí que bi´n eba esferens razas que s´emplegaban t´as corridas de toros, pero a trabiés d´a seleczion chenetica se conformó ista raza, igual como la resta de razas. Un atra cosa son os cabestros d´os San Fermins!!
Te dixo lo link de l´asoziazion de ganaderos de toro de lidia: http://www.toroslidia.com/ ta que beigas que como en a resta de razas bi ha una asoziazion que, suposo que igual como la resta, se miraran de fer os controls cheneticos y tot ixo.

aspero que no te moleste lo comentario...
esprisions!

Onset dijo...

Felquera, parix que os que somos antitaurinos (y en cuentra de cualsiquier tortura a os animals) somos "bichos raros" y, debán, d'os pseudo-argumentos d'os taurizidas, cal dixar as cosas claras. As imáchens lo dixan prou claro.

Chuan Chusé, desgraziadamén a mafia que embolica as torturas a os toros ye prou poderosa y ye en os poders facticos (igual se'n da que n'i aiga mullers) y desgraziadamén tamién ye un feito común a toz os países. Sisquiá s'elimine, pero ta ixo ferá falta una atra chenerazión d'ombres y mullers con balor.
Por zierto, felizidaz por o poema que traduziés, te quereba aber escrito y no me bagó.

Joan, ye una pena que istas torturas s'aigan exportato enta o tuyo país, t'America u Portugal; y que ixos países no las eliminen. Como n'o caso español caldrá que aguardemos. Bien se'n bale d'os catalans que son abanzando en ixe sentito (ayer i abió nuebas notizias).

Trobada de Fabloggers, ya beigo que he arribato tarde a la buestra combocatoria, ya me fa duelo. En zagueras no adubo y no me baga de fer tot o que querese. Grazias por combidar-me.

Zagal, pos no cal dizir más cosa.

Culibilla, prou que no me molesta o comentario, puez escribir o que te pete. He d'agradexer-te que partizipes en Onsera.
Prou que i hai -desgraziadamén- muitas formas de tortura, en ixo soi prou conzienziato. Por ixo mesmo n'o post ya deziba que n'i hai buena cosa y que en iste inte nomás quereba zentrar-me n'as que se fan a os toros porque tienen un "prestichio sozial" ya que se considera a os torturadors/asasinos como artistas (sic) u mayestros (sic). Ixo de garra traza se puede permitir. Bel día ya parlaré d'atras torturas. En tot ixo coinzido con tu.

Sobre o toro de lidia, siempre he leito que no ye una raza (http://www.animanaturalis.org/704). En tot caso, ni soi biologo ni mariscal como ta afirmar-lo claramén. De totas trazas, de o que diga a mafia ixa yo no me creigo cosa. Esfenderán as barbaridaz más grans mirando de chustificar o inchustificable.