domingo, 12 de julio de 2009

Güello

Fa bel tiempo se fizon cualques concursos, a lo menos en l'ambito d'a luenga castellana y estoi que tamién en o de l'anglesa, con a fin de que a chen botase a suya parola faborita, a que más goyo le feban, d'a suya luenga. I partizipó asabela de chen. Mesmo lo presidén d'o gubierno español i partizipó, y en trigó una que ye de l'asturleonés. A la fin me pa que ganó a parola amor.

Yo autocomboco un altro concurso chirmán d'ixos altros y, en l'ambito d'a nuestra luenga, dezido d'eslechir como parola güello. No ye de buen trigar, caldría pensar-ie arrienda. Altras me'n bienen enta o tozuelo, como por exemplo xiricuata. Con tot y con ixo, nos quedamos con güello. Ye clara, curta, senzilla y contundén.

Chirmanas (cuasi iguals) d'o nuestro güello son o güeyu astur-leonés, l'ull catalán u l'ollo/olho gallego-portugués. Ya nos cambia un poquet, pero no guaire, l'ojo castellano. Totas ellas fillas d'OCULU (encara que belún nos en meta una altra, de mai, y por tanto en tiengamo dos). Me pienso que en a resta de luengas romanicas as formas serán parellanas a istas que plegamos de nombrar.

Ista parola fa muita onra pa conoxer cómo ye a fonetica d'as diferens luengas (cosas en común, cosas que cambeyan), cómo han eboluzionato dende a mai latina dica arribar en as nuestras luengas de güe, cómo s'han transformato.

Güello ye, antiparte, una parola que se diz (u se deziba dica no fa guaire) igual o mesmo en Ansó, Alquezra, Benás, Pandicosa, Echo, Chistén, Estadilla, Orna, Adagüesca, Nozito, Rodellar, Nabal, Embún, Sercué que en Bielsa, Longars, Torla, Zirasuala... guallo. Sí, ye una parola común a toz ixos lugars y a muitos altros más, que s'ha mantenito dende fa buena cosa de sieglos. Ixo parando cuenta que bi ha que diz que no existe garra unidá lingüistica (!). Tamién en ye o bocable onso, que ye común a tot l'aragonés, a zonas de castellano con restos d'aragonés y d'o catalán en Aragón.

Charrando de güellos tenemos o berbo esgollariar, o sustantibo gollada (cast. ojeada, cat. ullada), y si un güello ye chicorrón, ye un gollet y si ye en plural? gollez. Qué en son de bonicas totas ixas parolas!




Aquí tenez más güellos de diferens animals: umanos, cans, onsos polars -os onsos tenemos os güellos bien chicorrons-, lupos, linzes (lupos zerbals?), focas, koalas, gatos y bubons. Uns son de mayor prezisión, altros son más galbans, altros no i beyen guaire, pero tamién ne b'ha que i beyen tot y prou bien. Uns son bien grans como platos y altros son bien chicorronez. Pero, con tot y con ixo, toz son güellos


Si belún querez dixar a parola que más goyo tos fa, por a razón que siga y en a luenga que siga, la podez comentar aquí.







6 comentarios:

Chabier Lozano dijo...

A yo me fa goyo "molatiera". No me preguntes per qué, pero m'encata la suya sonoridat. No se puede decir que sía una parola poetica, ye un útil, pero dende que la sintié per primer vez me quedé con era. I hai altras parolas pa altras ocasions (hue he sentito "apotracata", que m'ha feto muta gracia), pero se me preguntas cuál ye la parola aragonesa que me fa més goyo, estoi que ye ixa. Salut.

"O zagal de Molinero l'arco" dijo...

A yo a parola que me fa mes goyo ye ENGARDAIXINA.

fabla dijo...

Á yo a parabra que más goyo me fa ye "CHEN", pos asinas semos toz e totas, as chens d'iste mundo, as chens de toz es lucars e de no denguno.

Culibilla dijo...

a yo me cuaca "badina", cuento que porque me remera a o berano, o rio, bañar-se, u quemisio!, pero me fa goyo ixa parabra.

pochonez!

Chuan Chusé Bielsa Alquézar. dijo...

Son tantismas as parolas majas en a nuestra lengua (todas?).

Sargantana ye bien polida. Y rosada y rosera...

Y airera y ausín y zierzo, y nieu y plebia y dorondón, y plana y barella, y falsa, y almendrera y olibera. y fardacho y cardelina, y luminaria y boira y nuei, y fogaril y cadiera y calibo y chera, y saso y sarda y disierto, y estrela y amor...

RUBRA SIMIENT dijo...

Pos antiparte de uello, que tamién me fa goyo, en o mío lugar existe una parola que me choca prou: perconauta (perco en atros puesto), qualcosa como pezolaga, atra polida parola que tamién me fa goyo.