Onsera: Me'n baxo d'a tele

Ya ferá bels tres años que en una nuei freda d'ibierno oszense, d'ixas nueis fredas d'ibierno en que no i beis a dengún por as carreras, y que l'airaz sobate a la chen (y a las conzienzias), caminaba chunto con un d'ixas personas que gosamos denominar intelectuals d'a ziudá, enfilemos o camín, el o de casa suya y yo d'a onsera.

Estiemos parlando de diferens cosas (entre ellas, una d'as nuestras pasions: os gatos). No sé guaire bien cómo pero salió lo tema d'a telebisión: y béteme que me diz que el no'n tiene, de tele. Bai, nino! Cómo ye que a istas alturas d'a era, no'n tienga. Me dizió sí que en teneba pero yera una biellota, d'ixas en blanco y negro, que ya yera en casa suya cuan i arribó. Qué friki, pensé alabez.

A cosa ye que dimpués d'ixe tiempo, yo soi ixe friki, qui ha suprimito de tot a tele (encara que no l'he abentato por a finestra). En o zaguer año se pueden contar con os didos d'a man as oras que en he bisto, y prou que en sobrará, de didos; qui no ha pillato entre as mans un mando, qui no s'ha posato en un sofá...

Belún dirá Onset ye como ixos hippis d'os 70: no tiene cosa a beyer. O que pasa ye que la beigo com un meyo -tal como ye actualmén- preszindible de tot, que no bale ni pa entretenimiento. Millor ye mirar-se o zielo totas as nueis a contar estrelas que perder o tiempo debán d'ixe trastot. Y prou que yo no he suprimito unilateralmén a la tele, ye ella a que preszinde de chen como yo. Antes más yo fue un gran consumidor y encara lo beigo como un meyo que puede fer muita onra (por exemplo bien que se podría aprender bella luenga -l'anglés- bien comodamén, pero no interesa), pero a dechenarazión que ha tenito en zagueras ye intolerable y fa bergüeña. Yo me'n baxo, pos. Ye cheneralizablea totas as canals -más que más a ixa que tien un 5 en o nombre u ixa altra que diz que ye a d'Aragón y que d'aragonesa nomás en tien o nombre (podríanos meter buena cosa d'exemplos). Y que no me digan que si no te fan goyo ixos programas de 'alparzers', no los beigas y metas altra cosa: y qué cosa, sino bi ha alternativas. Ye recomendable que un ninón -u nino- beiga a tele de tardes (a lo menos cuan la beyeba yo, me pienso que agora será igual u pior). Un amigo d'os animals se i bei representato? Más bien tot o contrario.

Tenemos un conoximiento real d'o que pasa? Más bien tenemos a bisión d'imperios mediaticos -ya no pas son grupos-. Por exemplo, por qué no ye importán que Bolivia se combertise en un país libre d'analfabetismo -España encara no'n ye- y no salise en garra meyo (en Onsera y poco más, ;-). Porque gubiernos, entre altras cosas, corruptos y autoritarios, no son criticatos porque afaborixen a ixos meyos y os que no son notizia tot o día. Y que conste que no charro de politica ni cosa parellana.

Podríanos parlar-ne arrienda más, pero con isto en tenemos prou.