miércoles, 23 de diciembre de 2009

Amanex


A la fin amanexió Camille por a bal d'Ansó, por an que gosa estar y por a bal de Roncal, sobrebibindo en un ambién mica faborable (as fotos las podiemos beyer fa poco en bel periodico aragonés, mesmo l'adedicón -en dos casos- a portalada y as fuellas prinzipals; cómo ha cambiato as cosas, agora diz que bi ha conzienzia)

Parex que Camille se trobó con un chabalín. A suya alopezia en a parte de dezaga ha empiorato, pero, en tot caso, planta fuerte. Cal parar cuenta que ya tien bels 25 años


Cuatre onsos (toz mastos) queda en as nuestras montañas d'os Perineus que, como cuatre tions montañeses encadatos en casa, campan como zaguer testimonio d'un mundo que desaparex

En iste sentito, no fa guaire, en Copenhague se dezidiba de continar con a extinzión d'o mundo y de cuasi totas as espezies que i biben sin fer ni un sacre por mirar d'apatrusquiar o problema. Entremistanto por as carreras os chóbens chilaban: no cambiez o clima, cambiaz o sistema

martes, 15 de diciembre de 2009

Alquezra

Güe no feremos o chuego ixe de fa bel tiempo de mirar d'endebinar cuál ye o lugar que s'amaga en as fotografías, porque en ista ocasión ye de buen endebinar. No meteré so que bella foto (en tiengo muitas más, pero entre que puyan t'aquí y asinas de bez no cargamos tanto).
Una interesán zona ta tresbatir-se-ie (no en sentito literal, como fan os franzeses), de recorrer-la, de beyer-ie buena cosa de lugars y lugarez (Abargüela, Adagüesca, Raiquero, San Pelegrín...), d'arte, de cultura y prou que de naturaleza; y que, de bez, nos sirbe de puen enta Sobrarbe u enta altras zonas d'o Semontano u d'a Plana de Uesca.
Asinas que chen de toz os países, conoxer Alquezra (y a redolada, y a comarca, y o país entero).



Diz que Alquezra (Semontano de Balbastro) ye, chunto con Albarracín -encara que yo en metería más-, o lugar más bonico d'Aragón. Dende alto se i pueden beyer buenas ambistas de tot lo lugar -d'a colechiata y d'o castiello- y, prou que sí, de tota la zona. Antiparte que, fa poco, han apatrusquiato tota la zona d'alto.



O toponimo, seguntes os estudiosos y a documentazión, biene de l'arabe Al-Qasr 'a fortaleza', pos fuen os arabes qui en o sieglo IX debantón o lugar. En 1065 pasó a las mans de Sancho Ramírez, rei aragonés (a no estar que bienga de l'ibero y signifique 'fabas royas con dos foratez en meyo que se replegan en l'ortal de Casa Chuan, chunto a las noqueras y as pereras, d'ibierno en que se fa de tardes y fa sol; en o 'güeno'l día', como se diz por aquí). En tot caso, etimolochías a un canto, güe a unica denominazión ye 'Alquézar'. Bien ye zierto que bi ha un cartel de Prames -a qui cal agradexer-les-ne- en dentrando en o lugar que i mete a denominazión bilingüe aragonés/castellano. Pos ixo que ta meter-ie Alquezra -a propia y orichinal- no cal garra lei.
A lo menos i queda b
el toponimo tradizional.



O conchunto formato por o castiello y a colechiata


Ilesia de San Miguel



Alquezra ha cambiato muito d'o que ye güe a o que dica no fa guaire fue. No sólo que a o sistema tradizional, as carreras, as casas... tot ha cambiato. Güe ye una billa de turismo.

A os que tos interese beyer fotos d'antes más -d'inizio d'o sieglo pasato- d'os nuestros lugars, d'as nuestras chens y de muitas cosas más, bien luego en Uesca se ferá una exposizión de f
otos de l'archiconoxito Ricardo Compairé (1883-1965). Será dende o 19 d'abiento en a DPH.
Aquí en tenemos un exemplo: